طبيعي؟

انا من الناس اللي ما اعرف اقعد من من غير شغل اغلب الاوقات… ما ادري اذا هذا الشيء طبيعي بس لما اخلص شغلي و أقول لنفسي لازم اقعد كم يوم ارتاح فيهم.. بعد يومين احس ان في شيء قاعد يفوتني و جلوسي من غير شغل فشل! مع انه انا اشتغلت ليل نهار لمده شهر…

اعتقد ان هذا شيء مو طبيعي.. و لازم الانسان يحترم احتياجاته من ناحيه الراحة.. شوي شوي قاعده اعلم نفسي ان مثل ما قاعده احترم مشاريع العملاء ، التزامات الشغل لازم احترم مواعيدي اللي احطها لنفسي للراحة.. لازم احترم التزاماتي بحق نفسي..

كوني ام و صاحبه عمل.. دايما الاقي نفسي مقسمه وقتي للعمل او للأسرة… ويني انا؟

هل هي انانيه اذا الام عطت اولويه لنفسها؟ اعتقد مثل ما عيالك و بيتك يبونك مركزه معاهم… نفسك بعد تحتاجك تركزين معاها…
لازم اتعلم ان عادي اذا الصبح قررت اشرب قهوه مع صديقتي بدال ما اروح المكتب .. لازم ابلش اتعلم ان عادي اقعد بالبيت و ما اسوي شيء او ما افكر بالشغل.

الكثير يعتقد ان صاحب العمل له كل هذه الحريات… لكن بالعكس.. انا عن نفسي اشوف اني ملتزمه بالدوام و حضوري اليومي و انا مركزه ١٠٠٪ بالشغل اكثر من بعض الموظفين اللي يعملون بقطاعات مختلفة! انا لما اداوم فعلا ساعتي كلها بالمكتب مكرسه للعمل..

من بعض الامور اللي ابي اغيرها بنفسي هي:

وقت اكثر لي

تقليل من التوقعات الغير واقعيه من ناحية إنجازات العمل.. أي انا احط لنفسي اهداف كبيره واطمح تحقيقها بأوقات قصيره.. تصبح مرات تعجيزيه ترهقني وتحبطني.

اقلل من عمل اللي ما احبه.. في وايد أشياء بالشغل أسويها قصب.. لأنها زينه للشغل من الناحية المادية… مرات احتاج أقوم بمشاريع او مهام في قرارة نفسي ما تستهويني ولا تسعدني لكنها مفيدة للشركة بشكل عام… احتاج الشجاعة اني أوقف هذا الشي!

ابي أكون اسهل على الفريق.. لأني ابحث دائما عن الكمال فأتوقع الكمال من الكل و هذا مستحيل! مرات لازم أتذكر ان الفريق يقوم بأقصى جهده والأخطاء وارده..

كتبت سابقا مقاله اسمها العمل الحر حامض حلو.. انصح تقرونها اذا ما قريتها..