حديقتي

رغم ان مقاس حديقتي ما يتعدى ال ٢٠ متر مربع لكن اشوفها هي قلب بيتي… بسبب تصميم البيت و موقع الحديقه محاطه ببنيان عالي خلتني اتمتع فيها اغلب ايام السنه… هي دافئه في أيام الشتاء البارد محميه من الرياح القويه… و بارده في أيام الصيف لانها مصممه ان تتغطي في اشهر الصيف القارص ف تكون وايد ابرد من المناطق المكشوفه… المهم ان اعاملها كانها صاله و احب احس انها ملمومه.. شلون؟

١ – قطع الأثاث اللي فيها مثل أي جزء بالبيت منتقيتهم من محلات مختلفه… ابدا ما افضل اني اشتري جلسات طقم.. القنفه من بوتري بارن.. الكراسي من اندونيسيا الطاولات من هوم اند قاردن و غيرها من قطع من محلات مختلفه.

٢ – السجاده لعبت دور أساسي ان تحول قعده الحديقه من قعده عاديه الى قعده مريحه كاننا داخل البيت لكمن مستمتعين بالجو الخارجي

٣ – المعلاقات و الابجورات مو شي دايما نشوفه بالحديق… لكن ليش لا.. طالمه المعلقات مصنوعه من مواد مقاومه للحراره و الرطوبه ف مافي اي مشكله.. و ممكن الابجوره تدخل البيت وقت اللي ما نقعد بالحديقه.. يعني استخدموا أي ابجوره من البيت.

٤ – الاكسسوارات… مهمه عندي بالحديقه اطلعهم وقت ما اكون قاعده بره ، احب اغيرهم بين فتره و فتره و هي اكسسوارات أصلا عندي بالبيت… شموع، قطع فنيه، فازات و وورد..

٥ – و احب اكسر القعده ب الوان عن طريق المخدات- و بين فتره و فتره اغيرهم بالوان مختلفه عشان احسن ان القعده تجددت و ما امل

٦ – و موغلط تضيفون بعض المخدات الكبيره و البفات باماكن مختلفه للي يحب يقعد على الأرض. و هي تضيف جلسات اضافيه اذا انترس المكان.

الموسيقى… دايما احب ايكون في صوت خافت في الخلفيه سواء صوت فيروز او البحر او حتى موسيقى هاديئه… احس جني قاعده بأحد الفنادق بدول آسيا…

و اخر شيء مهم اوضحه اذا كنتوا من النوع اللي يحب يستضيف ضيوف وايد عنده تاكدوا ان في مكان لعرض الاكل عليه او المقبلات او حتى الشاي و يكون مكان محدد معزول، ارتب و احلى…