من وين نبتدي؟

بنصمم غرفه السؤال اللي دايما انساله فرح وين ابدي.. فرح شلون ابدي؟ كلنا ندري شلون اي شي بشكله الكبير يخوف و صعب.. لكن إذا اخذناها خطوه خطوه بتكون اسهل.. اللحين اول شيئ ابي منكم انكم تتخيلون اللي ودكم تشوفونه بالغرقه.. مافي حدود.. اخذوا افكار من مجلات – كتب- مواقع.. حتى المسلسلات و الأفلام لها دور كبير بالتاثير على ستايل الديكور. للعلم كثير من المسلسلات المهمه الاجنبيه و الأفلام لهم دور فعال بتغير و تحريك الموده بالديكور.. مثلا مسلسل اقلي بتي اثر وايد و رجع ديكور السبعينات بالمكاتب و المساحات.

نرجع لموضوعنا، تصميم غرفتكم. ابيكم تبلشون تجمعون صور,, سوولكم فايل، اذا انتوا ليلحين بعهد الورقه و القلم (و انا منهمه) سولكم فايل صجي و حطوا فيه صوركم.. عشان نسهل على روحنا الشغل كونوا مرتبين من البدايه، وزعوا الافكار حسب الموضوع. مثلا: اضاءه، ارضيه، افكار اسقف الخ. اما اذا كنتوا من اهل التكنلوجيا ف حفظوا صوركم الكترونين و رتبوهم بالمواضيع. شخصيا انصح في برنامج بنترست راح يسهل عليكم تجميع الافكار.

بعد عاصفه الصور اللي جمعتوهم ردوا شوفوهم.. اي كلهم شوفوهم و شوفا شنو اللي متشابه بينهم.. هل في اختيار للون اصفر متكرر باكثر من صورة؟هل في ستايل متشابه؟؟ سالوا نفسكم هل هذا هو اللي تبونه؟ اي هو؟ تمام وصلنا خير.. بلش التصميم اللحين. عرفنا الحين انتوا شلي تبونه.. ركزوا عليه بلشوا فكروا بكلمات تعكس هلي جمعتوه.. مو لازم تكون الكلمات واضحه و صريحه.. مثلا ستايل قرنسي بلمسه صناعيه ـ تحديد اسم و كلمه للستايل اللي تبونه راح يسهل عليكم المهمه الجايه.

اوكي؟ واضح ليلحين؟ تمام… الغرفه اللي راح نصممها.. من له؟ شبنسوي فيها؟ كم عدد الناس اللي بكونون فيه؟ شنو ستايل حياتكم.. مثلا صاله استقبال في بيت محافظ تختلف اختلاف تام في التقسيم ، النوزيع و المكان من غرفه استقبال في بيت اسره مختلفه او اجنبيه..كونوا صريحين مع نفسكم و لا تقلدون بيت جيرانكم او بيت اصدقائكم.. كل واحد له نمط و ستايل حياة مختلف. مثلا من يقول لازم صاله الاستقبال تكون كبيره و وسيعه و في اول البيت؟ نسال تفسنا انا بيتي بكون كله في ضيوف؟ هل انا من النوع اللي لي خلق عزايم كل اسبوع؟ لا؟ كلش مو ستايلكم؟ انزين شماله استقبال يردح فيه الخيل؟ ما كو شي اسواء من غرف مهجوره بالبيت.. طلعوا قيمه كل شبر بالبيت.. مثل النفنوف الغالي نكده كد عشان نطلع قيمه.. بيتكم لازم يكون لكم ـ يسعدكم ـ تستخدمون كل جزء فيه! و كل يوم

المساحه الل قاعدين انصممها؟ هل هي ترميم لشيء قديم.. المساحه القديمه كان فيها شيئ بالاستخدام يضايقكم ؟ مثلا لما كان احد يزوركم كنتوا لازم اطلعون شي من الغرفه لانه كانت ضيج؟ فهموا شنو لازم يتغير .. جذي انتوا اقرب لغرفه راح تريحكم.. بعض الاساله: متى تستخدمون الغرفه بليل او الصبح؟ هل الغرفه للضيوف؟ للاسره؟ او للكل؟ هل بهل غرفه تبون تكونون مرتاحين لدرجه ان اي احد ممكن ينسدح على القنفه؟ يمد ريله على الطاوله؟ صج سوال جدد مهم.. لانه انا ماراح اشتري قنفه بذيك القيمه و اخر شي الاخت فوز تنام عليها وهي تشرب حليب! اللحين المهمه الصعبه: صوروا كلشي بتستخدمونه بالبيت القديم او الغرفه القديمه.. او حتى من غرفه ثانيه.. لما تشوفون كل قطعه بروحه اسهل انكم تحددون تمشي مع الكلمات اللي حددتوهم لستايل غرفتكم الجديده؟ بعد التصوير.. اعيدوا توزيع الصور لاربع مجموعات: ممتاز للاستخدام كما هو ، استخدام بعد بعض التغيرات (تنجيد، صبغ الخ) ، توزيع ، و غير قابله للاستخدام ولازم تنقط ( نحاول كثر مانقدر ان نتبرع فيهم بعد تصليحهم ان امكن) اذا شيئ كنتوا كارهينه في بيتكم مثل ابجوره صارلها 10 سنين عندكم,., لا تعتقدون ان فجاء راح تحبونها.. لازم قرارتكم تكون صارمه و لاتبتدون بشيئ انتوا اصلا ماتحبونه. عرفنا شنوا راح نسنخدم و شنو راح نوزعه؟ اوكي الحين اخذوا مقاسات كلشي بيرجع يستخدم بالغرفه.. لانه لازم نتاكد ان كل شيئ له مكانه.. ادري وايد شغل.. ليش عبالكم شغلنا سهل؟

الشيء الاصعب اللحين, رسموا الغرفه… سواء بستخدام ورق هندسي و قلم او برامج الكترونيه المهم ان نرسمها بالمقاسات الصحيح… بعدين نبلش نوزع اثاثنا.. بالاحرى نقرر شلون نبي توزيع الاثاث؟ فنفه وحده رسميه و كرسيين مقايلينها؟ قنفه ال؟ القنفه معطهيه المدخل ظهرها؟ شلون تبون توزعون الاثاث بالغرفه؟ الافضل نفكر اكثر من فكره و انشوف شنو الانسب بعد ما نبحث عن الاثاث بالسوق.

والحين الجد… كم تبون تصرفون؟ كونوا صريحين مع نفسكم و واقعين ان الاثاث ممكن يكون مكلف… كثير من الناس عادي تصرف 100 دينار على حذاء.. بس تفكر مليون مره اذا الطاوله الجانبيه بهذا السعر.. ترى الطاوله بطول عندكم اكثر.. للعلم. الاهم من السعر.. شنو السرعه اللي تبون تنفذون فيها الغرفه؟ مستعيلين؟ بتشترون كلشي مره وحده؟ هم هشي يفرق، هل بشتري شي واحد غالي و هو المهم بعدين اخذ اشياء عاديه و رخيصه للباجي؟ بعدها لازم نبلش نكتب للسته للتسوق.. انا شنو لازم اشتري.. و كم حاطه ميزانيه لكل قطعه.. هذه اللسته راح توضحلكم في كل مراحل التنفيذ انتوا كم كنتوا حاطين ميزانيه لقطعه معينه و بكم فعلا شريتوها… مهم ان نعرف احنا وين من ناحيه استنفاذ الميزانيه المحدده طول وقت المشروع. التسوق و البحث.. لازم نشوف شنو اكو بالسوق,,, و شنو ممكن يكون ضمن ميزانيتي.. زوروا محلات اثاث – تشطيبات-اضاءه- اقمشه و غيره (كل شيئ تحتاجونه) جمعوا صور ، اسعار و عينات.. هذا كله طبعا قبل ما نشتري شيئ.

بعد ما صار عندنا عينات و صور للاشيائ اللي راح نشتريها.. لازم نسوي لوحه افكار.. هذه اللحين هي مرحله اللي تنقلنا من تصميم لتنفيذ ز الشطاره ان كلشيئ يكون محدد و اللوحه راح تساعدكم لانه اذا تبون قنفه وحده ففي اللوحه ينكون صوره قنفه وحده و هي اللي راح تشترونها او شي شبيه فيه.. و ميزه اللوحه انها راح تشوفون كلشي مع بعض.. متناسق؟ متجانس؟ شيئ محتاج تغير؟

وبالاخير قبل ما نبدي بالتنفيذ… نحتاج جدول اعمال.. شنو الاشيائ اللي لازم تنعمل و شنو ترتيبها؟ القنفه محتاجه طلبيه تاخذ شهرين… فتكون متصدره جدول الاعمال.. الصباغ السباك الكهربائي ,, منو لازم يجي قبل الثاني… شراء القماش بعدها اخذ القماش للمنجد و غيرها من الاعمال اللي محتاجه لتسلس معين… الجدول بخليكم مسيطرين على الوضع و عمره الشغل ماراح تحسون انه وايد.. لانه مثل ما ذكرت في البدايه.. ناخذها خطوه خطوه.. و نركز على الخطوه الجايه فقط!