شنو لونكم المفضل؟

شنو لونكم المفضل…تصدقون لو اقولكم أنا ماعندي لون مفضل؟ أوكي عندي ميول للون معين اليوم لكن يختلف تماما عن اللون اللي كنت احبه او أفضله من سنتين. اليوم لي حب غريب و جديد للون الأخضر الملكي و الكحلي… كلاهم ألوان غامقة جدا و تختلف كل الاختلاف عن اللون الليلكي اللي كان عندي له عاشقه من كم سنه.. ما ادري شنو سبب هذا التغير في حبي للألوان .. لكن اللي اعرفه ان صارلي فترته طويله أحب الرمادي بكل درجاته و دائماً هو العنصر المتكرر في خلطي للألوان. دائماً أحب استخدم اللون الرمادي في اغلب خلطاتي بالمواد و الألوان.. مرات استخدمه بالأقمشة. مرات بالجدران عن طريق ورق الحائط الصبغ او حتى استخدام الكونكريت المكشوف..

أحب اللون الرمادي بقماش الكتان خاصه بالستائر او بتنجيد الحوائط..تنجيد الحوائط للكثير يعتبر مزعج و غير مرغوب والسبب ان القماش يجمع الغبار و غير سهل بالتنظيف لانه مانقدر نغسله او حتي نمسحه بفوطه رطبه.. انا من وجهة نظري الحائط المنجد حاله حاله الصوفا…. طريقه سهله لتنظيف الحائط المنجد هو استخدام المكنسة الكهربائية راح تقوم بالواجب و اكثر…

رغم ان للكثير تنجيد الحوائط غير مستحب لكن أنا اعتقد محاسنه تفوق مساؤه اللي بسهوله ممكن تنحل. شوفوا معاي بعض ايجابيات تنجيد الحوائط..

١- يعطي فخامه لأي مساحه

٢- يعطي دفئ و راحه و نحس فيها بوضوح بغرف الفنادق

٣- عازل ممتاز ممتاز ممتاز للصوت

٤- يقلل من حده و برودة الحوائط المصبوغة ..

تقدرون تنجدون حوائط محدده بالغرفة و مؤشري كل المساحه،أصلا كل الطوفه راح تصير مبالغ شوي.  ممكن تنجدون الحائط الكامل خلف السرير و هذا يغنينا عن استخدام الهد بورد. فإذا كنتو بتنجدون حائط السرير يفضّل ان تزيدون بكثافت الإسفنج تحت القماش و تستخدمون قماش شوي غامج لانه منطقه الرأس ممكن توصخ القماش. اما اذا استخدمو التنجيد علي الحوائط او حتي بيبان الكبتات اسفنج بسماكة ١سم كافي.

أنا دائماً لما أنجد بيبان الكبتات، وهدا حل جميل لخلق تغير جذري لكبتات قديمه، أتأكد ان تكون للبيبان مسكات لتفادي اي علامات او اثار من اليد او الاصابع علي الباب من عملية الفتح و الاغلاق.. و أخليكم اللحين مع بعض الصور اللي عجبتني و ممكن تأخذون منها أفكار بعد ما أقنعتكم ان التنجيد صديق لمساحاتكم… ممكن يعطي أضافه كبيره لغرفكم بميزانية صغيره.