بعيد عن الديكور

انا في ناس معاي تدير لي الموقع و ترتبلي المحتوى و تنضم جدولته و مواضيعه… و كل مره يقولون نبي مقالات نلمس فيها فرح!! مو كل شي رسمي و عن الديكور بحت! ما ادري شقول والله! فقررت هذا المقال تكتبه فرح الام… البنت.. الكويتيه اللي تحب الحداق (صيد السمك ).. و تتمنى انها تمارس هوايه الخزف .. انا كنت بنت جدا خجوله… و خوافه… بسهوله اسمع الكلام و مطيعه… كنت احب اني اكون الاول بالصف و انهرت انهيار ايام لما معدلي بالثانويه كان 3.99!! كله بسبب مدرسه عطتني درجه 89.4 و مارضت ترفعها ل 90! ما انساها بس جد اضحك على روحي اللحين! من صجيييي؟؟؟؟

المهم.. انا قاعده اكتب و ما ادري شراح اتكلم عنه.. صادف اليوم تكلمت في سناب عن فيديو، رغم اني مو اول مره اشوفه، لكن نسيته، لمسني للمره الثانيه… ما كانه تاثرت فيه المره الاولى! الفديو فيه النساء يتحدثون عن شنو ممكن يسونه لو رد فيهم الزمن! كلهم اتفقوا انهم كانوا راح يعيشون اللحظه… يضمون عيالهم اكثر… يكونوا باللحظه من غير ما يفكرون بالغد… اتركم مع الفيديو تشوفونه… و عيدوا النظر بلحظتكم.. عايشينها؟؟ و بعدها نكمل المقال اللي ما ادري شراح اقول فيه..

انا اليوم استخدم السوشل ميديا اني اوصل لكم… و ادري شلون هذه الوسيله هي سلاح ذو حدين… ممكن تفيدكم و تفيدني و ممكن تذبحكم و تذبحني… يقولون اول شعور تحسون فيه الصبح او تقولونه لنفسكم هو الشعور اللي يتبرمج بعقل الباطن. فتخيلوا تفتحون سنابات ناس بعمركم و اصغر كل وحده فيهم اتوريكم الجميل بحياتها حقيقي او مصطنع…. شصير فينا؟ انا ليش ماعندي جذي؟؟ انا ليش ما اسافر كثرها؟؟ انا ليش ماعندي مشروع مثلها؟؟ انا ليش مو سعيده مثلها!! جد والله اللي تشوفونه شيء و اللي داخلها شي ثاني.. هي مثلكم تشوف غيرها و تسال نفس الاساله.. لانه هي الوحيده اللي فعلا تدري و تعرف مشاعرها الصجيه… انا اوريكم جزء صغيييييير من حياتي العمليه! ما اوريكم ميزانيتنا.. ما اوريكم شكوى توصلنا من عميل… ما اوريكم لحظه انهيار انحاش فيها من المكتب للسياره.. لانه معاد الضغط يطاق.. لانه الانسان مايحب يبين نقاط ضعفه… لكن هذا طبيعي طبيعي جدا! و اتمنى تدرين ان انتي طبيعيه و مو المشروع و لا السفره ولا اسوار الماس او جنطه يحددون سعادتج! طالمه تدرين انج قاعده تسوين اللي تقدرين عليه بضمير مرتاح.. فهنيئا لك!

المهم بعد هل فيديو بهد المكتب و اروح اخذ فوز من المدرسه بافي ساعه على وقت الجرس…. لانه اجمل وجه اشوفه عليها لما تيني تركض بالمدرسه بعد ما تلمحني من بعيد!

يوم سعيد لكم.. راضين فيه عن نفسكم…. تحياتي