بعض من اللي مريت فيه!

متى اول مره سمعتوا عني؟ عرفتوا عن شغلي او مشاريعي او بالمختصر ان في وحده اسمها فرح الحميضي ؟ بعضكم يمكن من شهر؟ أسبوع؟ ناس من سنه و بالكثيييير من ٤ سنين… هذا اذ يعني شي فهو يعني النجاح ،اذا اسمي اللي انا واصلته نجاح بنظركم، مو سهل ولا شي سريع.. انا اشتغلت من عمري ٢١ سنه. بداياتي كانت مصمم حر اشتغل من مكتب صغير لكن كنت بروحي.. اصمم، اقابل عملاء، انزل المواقع، انزل السوق ، اسوي كل شي بالمشروع من غير الاستعانه باي شخص.

اليوم صارلي فوق ال ١٥ سنه… و يدوووب توه تعرفوني.. و أصلا اعتبر محظوظه ان اللحين لي حضور بهذا بالسوق الكبير.

لما بلشت اشتغل السوق كانوا محتكرينه الأجانب.. يعني بس جنسيات معينه تسمعون انهم مصممين ديكور.. ما كنت اذكر علي وقت ما اشتغلت كان في ناس وايد يمكن اعد الكويتين علي ايد وحده.. اليوم اعتبر تخصص التصميم داخلي الهبه.. الكل صار يبي يمتهن هذه المهنه فصار الانفراد صعب،، التميز صعب لانه المنافسه كبيره.

المهم نرجع لبداياتي… بعد شغل تقريبا سنه قررت اني احتاج سكرتيره تشيل عني الشغل الإداري من مواعيد، لكتب و غيره.. بعدها عينت محاسب . بعد ما زاد الشغل شوي عينت مصمم معاي بعدها رسام… و شوي شوي على مدار٣ سنين صار عندي فريق كامل في ٣-٤ رسامين ٣-٤ مصممين و قسم اداري كامل.

حجم مكتبي في ٢٠٠٦ كان ضعف حجم مكتبي اليوم… في ٢٠٠٨ مع الازمه الاقتصادية وايد وايد تأثرنا… وتعلمنا درس.. كنت في ذاك الوقت بس اصمم وانفذ تصاميمي، ما كان للمكتب أي مصدر دخل ثاني..

الازمه الاقتصادية كانت بمثابه صحوه لي… و لازم اذكر ان حزتها قل الشغل وايد.. ولازم اعترف اني في ذاك الوقت مهارتي الاداريه معدومة لانه اغلب المصممين بالجامعه ما يدرسون اداره… فقررت ان لازم اخذ ماجستير بالعلوم الاداريه لانه الأسلوب اللي كنت قاعده ادير فيه المكتب كان معتمد على المحاوله و الخطاء.. و لقيت نتيجته بوقت الازمه الاقتصاديه… كنت في مصيبه! لما أقول مصيبه يعني ما كنت ادري شلون راح ادفع المعاشات الشهر الجاي! لكن رفضت اني استسلم.. و كنت محظوظه بفريق وقف معاي.

كنت اشتغل الصبح و اروح الجامعة بليل،،، لمده سنتين تقريبا حياتي الاجتماعيه كانت منتهيه كان وقتي كله للدراسه.. المهم بعد الازمه و بعد الدراسه تعلمت ان لازم الانسان يكون حذر جدا بالتوسع… و يحاول ان يكون الفريق عنده متكيف للعوامل الخارجيه.. يعني الفريق اللي ظل عندي هم أشخاص متعددين المواهب يقدرون يشتغلون اكثر من شيء و ياخذون مكان اكثر من موظف..

و من اهم الأشياء اللي تعلمتها ان مايصير اعتمد على خدمه وحده اقدمها او سلعه وحده.. لازم يكون عندي تشكيله مختلفه من الخدمات اللي تتكيف على حسب الطلب بالسوق.. فتشوفون اليوم انا بالاضافه للتصميم صار عندي منتجات جاهزه ابيعهم (بيسز باي فرح) و اقدم دورات مختلفه بالتصميم (سي بي اف) و لي نشاط اعلامي بحيث اقدم اول برنامج عربي متخصص بالتصميم الداخلي (تصاميم مع فرح)، و بعد في خطط وايد و تشعبات راح تشوف النور خلال السنه القادمه، وكلخا تدور حول التصميم الداخلي بس لها سوقها بروحها..

ف اللي قاعد أحاول اسويه هو اني اتنوع بحيث اذا شيء طاح شيء ثاني يشيله… و كل خط من خطوطي له سوق مختلق مثل ما تشوفون قسم التصميم هو للناس اللي ما يبون يصممون بروحهم و عندهم القدره الماليه يعينون مصمم.. و قسم الدورات للناس اللي تحب تسوي كلشي بروحها، و قسم الإكسسوار المنزلية له سوق أوسع… ف اللي يقدر ان يتشعب لازم يتشعب عشان يستمر في حال صار أي خلل بالقوه الشرائيه في أي شريحه نتعامل معاها..