غرفة طفل مودرن بالوان حديثة

ذكرت في حلقاتي السابقة في برنامج تصاميم عن غرف الاطفال و الالوان اللي افضلها لغرف الاطفال و ذكرت انه مو لازم دايما نتقيد بالالوان التقليدية اللي اهي الازرق للاولاد و الوردي للبنات، في لوحة الافكار الموجودة جمعت من محلات مختلفة في الكويت و في دول الخليج اثاث لتكوين غرفة طفل بالالوان المحايدة مع اللون الاصفر اللي دخل حتى يعطي تطعيمة جميلة في الغرفة. السجادة في لوحة الافكار هذه هي القطعة الاساسية اللي من خلالها استخرجت الوان الغرفة. بعض القطع الوانها سادة و بعضها منقشة. الاستخدام الصحيح لخلط الاقمشة هي اننا نقدر نخلط اي نقشة مع اي نقشة ثانية و لكن كل اللي علينا نسويه اننا نلتزم بالالوان الموجودة بين نقشة و الثانية. مثل لوحة الافكار اللي امامكم، السلة فيها نقشة و السجاد فيها نقشة و حتى فرش السرير فيه نقشة مختلفة تماما عن النقشات الباقية، اللي خلى التصميم ينجح انهم فيهم من نفس الالوان.