مفضلاتي للمواليد والأطفال

بعيد عن الديكور… بكلمكم اليوم كام.. مثل أي ام ابي الأفضل لاطفالي… و من مده قريبه جدا وصل اخو جديد لبنتي بفوز… ف استرجعت الذاكره لكل ما حبيت استخدامه لفوز وهي بيبي و رضيعه عشان ارجه استخدمه لاحمد…

اهم شي عندي كرسي السياره.. الحلو فيه ان هو كرسي واحد يناسب من عمر الرضع لاربع سنين.. فوز ليلحين تستخدم كرسيها و شريت غيره لاحمد.. مريح لانه أولا تركيبه ثابت جدا، و الكرسي يلف ٣٦٠ درجه ف وايد سهل اني اركب الطفل و هو مجابل الباب.

Brand – cybex

لما صالتي تكون بدور مختلف عن دور الغرف مهم عندي يكون في سرير خفيف و مريح للرضع يكونون دايما يمي في ساعات اليوم.. و خفيف و سهل التحريك في حال ماكنت ابيه يكون موجود لمل يجوني ضيوف.. ف مو شيء ياثر على ترتيب الصاله. هذا السرير وايد عيالي برتاحون فيه و هم فوز ظلت تستخدمه لين صار عمرها سنتين تقريبا تقعد عليه،،، له غطاء ينشال و ينغسل و هذا الشيء كلنا ندري شلون مهم.

Brand – doomoo

و شيء تكلمت عنه وايد بسناب هي جنطه فوز اللي نحط فيها ملابسها و غياراتها لما تطلع،، طبعا فوز كبرت اللحين و ما عادت تحتاج جنطه بهل مقاس…. جنطه زارا هوم..عجيبه.. خفيفه و سيعه و تنغسل… معاها ممكن تشترون شنط صغيره من نفس القماش عشان ترتبوين محتوياتها مثلا الحفاظات و مشتقاتها بشنطه، الغيرات و الملابس بجنطه و غيره… اذا كنا طالعين و احتاج اغير لفوز ما اخذ كل الجنطه الكبيره لغرفه دوره المياه بس اخذ الجنطه الصغيره اللي احتاجها في وقتها..

اما للعربانه لما كنت ادور لفوز كانت لي مواصفات ادور عليها… طبعا وايد كنت منجذبه اني اشتري اجدد نوع و اللي فيهم مليون سالفه و سالفه لكن كان وايد مهم عندي انها تكون خفيفه و انا اقدر اشيلها. لانهم مو دايما اطلع مع السايق و ممكن اكون شايله البيبي و ابي افتحها، فضروري انهل سهله الفتح بيد وحده.. انا عندي هذه حق استخدام بعمر الرضع و في الكويت . الحلو فيها بعد ان تجي مع كرسي يناسب الرضع و يصير نفس الوقت كرسي سياره و لما يكبر الطفل يتغير شكل الكرسي… فتطول معاكم ٤ سنين.

Brand – graco

و اذ بسافر اخذ هذه معاي لانه اقدر اركبها معاي الطياره.. اصعب شي بيبي او طفل بالمطار من غير عربانه… تتسفط و تنشال مثل الجنطه.

Brand babyzen-yoyo

لما الطفل يبلش ياكل يحتاج كل الاكل يكون مهروس… هذا الجهاز عجيب.. لانه يفوح الخضروات و يهرسها بنفس الجهاز.. سهل جدا و ما يأخذ وقت… انا ما احب اعطي الأطفال اكل معلب ف كل شيء اسوي طازج بالبيت…

Brand – avent

أتمنى ان فدت الامهات الجدد و اللي راح تصير ام قريبا… الف مبروك..